Trajneri Orges Shehi foli sot perpara kamerave ne konferencen e rradhes per shtyp ne prag te ndeshjes KF Tirana-KS Kastrioti qe do te luhet diten e neserme ne oren 13:45 ne stadiumin “Air Albania”. Tekniku u pyet per situaten e skuadres, mungesat, perballja me Kastriotin etj. Meposhte deklarata e plote e trajnerit:
Patjetër që fitorja na kthen aty ku do të donim dhe sigurisht që është një fitore që ka vlerë. Gjendja e skuadrës është e mirë, por fatkeqësisht në ndeshjen e kaluar humbëm Najdovskin dhe këto ditë presim përgjigjen sa kohë do të mungojë. Xhixha nuk është akoma i gatshëm dhe Përgjoni po ashtu. Këto janë tre lojtarët që do të mungojnë në sfidën e nesërme.
Në fazën e parë është e vërtetë që kemi barazuar me Kastriotin. Ndeshjet të tilla duken të lehta në letër por janë të vështira ndaj do vlerësim e përqendrim maksimal, pavarësisht pozicionit ku ndodhen ekipet në renditje. Ka vlerë tre pikësh dhe do të ketë vlerësim maksimal nga ne.
Sigurisht jemi të kënaqur me atë që po japim në fushën e lojës, sigurisht duhet të vazhdojmë me këtë mënyrë e ritëm. Skuadra duhet të prodhojë lojë se jep garanci për vazhdimësinë, kemi ndërtuar skuadrën pothuajse nga fillimi. Lojtarët nga java në javë po njohin më shumë njëri tjetrin, pasi disa lojtarë janë bashkuar së fundmi me pjesën tjetër. Shpresojmë që të përmirësohemi nga dita në ditë.
Ndeshjet janë afër dhe nuk kemi shume kohë për të punuar dhe kur janë ndeshjet kaq afër nuk ka shumë kohë për të punuar e përgatitur ndeshjen tjetër. Por kemi panoramë të qartë për çdo ekip dhe sigurisht që këto ditë të mundohemi më shumë të punojmë nga ana teorike se sa tekniko-taktike.
Është shume shpejt për të folur për merkaton e janarit, ne kemi skuadër të mirë e të kompletuar. Merkato në janar nuk të ofron shumë mundësi ku duam të përforcohemi. Nëse nuk gjejmë lojtarë për t’u përforcuar, kemi kontingjentin e mjaftueshëm për të përballuar sezonin.
Për të folur ku duhet të ndërhyhet në merkato është pak shpejt për të thënë. Kur arrin në këtë pikë ku jemi e dihen qartë objektivat edhe ne duam të përforcohemi. Por gjithmonë duke gjetur elementët që na shpërbejnë si nga ana e karakterit sportiv të lojtarëve, ashtu edhe nga e cilësisë.